Գառան դմակ

Գառան դմակը հին տեղածին սպիտակ սորտ է, որը տարածված է հիմնականում Արմավիրի մարզում և Արարատյան դաշտի այլ հատվածներում։ Այն ուշահաս է, պտուղները դեղնականաչավուն են, երբեմն՝ ոսկեգույն։ Հայաստանի խաղողի և գինու հիմնադրամի տվյալներով՝ սորտը լավագույնս դրսևորվում է քարքարոտ, կավային և կիսաանապատային հողերում։ Գառան դմակը հայկական կոնյակի համար թույլատրված սորտերից է, դրանից պատրաստում են նաև չոր սպիտակ գինիներ։